Matthew 24

anóm-bonoꞋ-namba tawisí-áímbá siráin-kwasai.

Mááka 13:1-2, Árúku 21:5-6

1Ísu mináímbá simásuwowasaya anóm-bonoꞋ-naumpakemba kárúwesa kúmúmba kwená kwayó-kwáásí sésa anóm-bonoꞋ-namba kaweꞋ-námbán-ivo awánaao suwaná 2Ísu séna ívéꞋo awánaan-dantaveꞋa simátimeꞋa séꞋa aáno kwaási tésa mindámbá amápaꞋa tawísíyuwesa amápar-ontankwarare tawísíyuwanaaowe Ísu siráiye.

sáwí-kanaa tíníye siráin-kwasai.

Mááka 13:3-13, Árúku 21:7-19

3Ísu mináímbá simásuwena Óríve-omakaꞋa umáyowasa kwená kwayó-kwáásí kweyáá máyonkaꞋa tésa áísaa esa sésa emó sénda nósa-tawaiya tíníyo. nóran-awaamera ínata séta ákíraꞋa emá kuméma ívéꞋo kwáyáin-tantaaꞋa ánásaniye sénaumno suwaná 4Ísu séna kampar-áímbá iséꞋa áraire sevó kárákwiyoro. 5sáwíva-kwaasi tóyo ésa kesúwíꞋa mágwétesa sésa Áánútumo usásisinkaiwai úne síyasa sáwívarawai minkámpár-áíntávésa áraire sénááowe. 6ááiꞋo tíyáán-aimba némpakenaꞋi. egwaakénáꞋi. isáíyana íma tááꞋa kaíno. mirán-kánáámó tínda mindá íma amápa-tantaaꞋa ánásai-awaameꞋan-iye. 7moórá-ayampa-kwaasimo ááiꞋa tiyánááowe. moórá-kawaa-kwaasigomo éna moórá-kawaa-kwaasigona amááraayavena usásimbai ááiꞋa tíyáaro sínasa usásinesa ááiꞋa tiyánááowe. óꞋon-oꞋom-baravaꞋa ayawaimá táníye. óꞋon-oꞋom-baravaꞋa anóm-barima táníye. 8mirán-tántááꞋó paárínaꞋa séꞋa amápa-tantaaꞋo ánásanin-kanaa íma tiráivo iyámpóímo tinkánáe owanamó anón-tiꞋo intembá umbai-kánáámó tínímba miráumai ááimba ásáiye seró.

9mirán-áímbó síyasa minkákémbá keinárawaꞋa tátoꞋmai óꞋowima timíyasa sáwíꞋa umátinkesa tínkamiyaꞋa puwónááowe. kentáváímó asiramáímo máyáantavesa óꞋon-oꞋon-kwaasi amáparawai tíyámba umátinkanaaowe. 10kesááiyavesa áraire kwésiyawaivinkemba sáwívarawai kesáái tínaaemba umámesa miwítí namuro-kwáásí moórá-morawai agaráátinkesa tíyámba umátinkanaaowe. 11sáwívarawai paárésa kampaꞋá sésa Áánútun-aai simátimundawai úne sésa sáwívarawai kampaꞋá simátiyuwanaaowe. 12miráumai sáwí-mayaigo kóyáwé éna anómba ínasa óꞋowiti imáyáamo eémemba ivátuwesa kesáváí-ímáyááwé suꞋmai ónááovo 13ímo ivátuwesamo kentáváímó asiramáímo méwai ánásai-kanaaraꞋa Áánútu tíꞋmai kawepáꞋá métinkaniye. 14amápaꞋ-maravaken-kwaasi isánááontaveꞋa áséi-kwasai Áánútu kwená kwaásimo kawááin-aimba simátímaꞋmae iyíyana naaémba amápa-tantaaꞋa ánásai-kanaama tíníye Ísu siráiye.

sáwí-kanaagona kwaasái.

Mááka 13:14-23, Árúku 21:20-24

15Ísu mináímbá simásuwena séna naaémba ávááraumai inkaisí-yántáákómá paáriniye. naaóváꞋá Áánutun-aai simátímakaiwai áwíꞋa Tánieri mintántáátávéna siráiye Ísu siráiye. kemá Mátíyu séꞋa maanáúváímó torausíyawai tááko pééi sínaꞋa ísáaro kwésune. Ísu séna Áánútuna kaweꞋ-mápáꞋá misáwí-yántááꞋá paárínasa awánanaaomba 16Yútiyaa-maravaꞋo máyaiyan-kwaasi omápata isaaisésa iyánááowe. 17ontaráꞋó máyaiyan-kwaasi íma naaúmpaꞋa iyíyamba óísamba ivátuwesa úwoi isaaisésa iyónááowe. 18kígauvaꞋo máyaiyan-kwaasi íma naaópaꞋa iyíyamba unáánkwátói ivátuwesa úwoi isaaisésa iyónááowe. 19tímúkwarar-inimba ívér-iyampoigwarar-inimba minkánáámá sáwíꞋa ónááowe. 20isaaiséꞋo iyónááomba táúgwi-kanaa iyéꞋa agándai-kanaa iyéꞋa únavo séꞋa ÁánútumpaꞋa námúnaa seró. 21minkánáámá tínímba anón-umbai táníye. naaóváꞋá Áánútu maramá tarórumba ívéka toꞋmái mirán-úmbáí-yántááꞋá íma tiráiye. aánogwaraꞋa mirán-úmbáí-yántááꞋá íma tíníye. 22mirán-úmbáí-yántááꞋó kwéin-kanaa Áánútu ákíse úmakaiye. mirán-úmbáí-yántááꞋó kwénin-kanaamo ayáátáákaꞋo kwéninkakai amápa-kwaasi íma úwoi túvamai máésino. Áánútu ítámakain-kwaasiyavena imáyáa éna mirán-úmbáí-yántááꞋá ákíse uráiye.

23ákísemo ínasa évakarawaimo simátimesamo sésamo Áánútumo usásinankaiwai miváꞋ-maavaꞋa máyáiye síyaꞋo éꞋa íma ísáaro. 24évakarawai paárésa kampaꞋá sésa Áánútumo usásisinkaiwai úne síyasa évakarawai kampaꞋá sésa Áánútun-aai simátimundawai úne simátímaꞋmaesa naaónááomba ímo awánem-bayai kwémaesa Áánútumo ítámakain-kwaasi kampaꞋá simátiyuwanae sésa mirán-ánóm-báyáí mayánááowe. 25miwíyávéꞋa árai-kwaasin-owe sevó séꞋa íma paáruraankaꞋa aivaꞋá simátimumpo kárákwiyoro.

26súnda-aimba imáyáa éꞋa naaémbo moóráwaimo kentávénamo sénamo paárurena kavóná-maravaꞋa máyáiyemo sínaꞋo éꞋa íma koró. moóráwaimo kentávénamo aúpáꞋá máyáiyemo sínaꞋo éꞋa íma áraire seró. 27kwíyómpaꞋo tawáombo úmae kwisasamó awánaantemba kemá kwaási úrandako kumpaáruraundawai miráumai avoraꞋá ókwaraꞋa kumónaumne. 28póímo awáímó kaviraipáꞋó náíndayavenamo evontáán-dúmáómó torupamáímo máyáintemba Áánútu sínana súnda-aimba paáriniye Ísu siráiye.

Ísu marapáꞋá kumínín-kwasai.

Mááka 13:24-31, Árúku 21:25-33

29Ísu mináímbá simásuwena séna mirán-úmbáí-yántááꞋá tínín-kanaama ánásainana aaváúmá túnkwinana kwíyómba íma sán-káínana oꞋá kwíyómpakemba kuntínana kwíyónko toraꞋnaáraꞋa ínasa 30amápaꞋ-maravaken-kwaasi kwíyómpaꞋa awánanaaomba óꞋoran-tantaaꞋa awánésa kentávésa sésa kumíníyena toꞋmayaa kwéiye sésa táátavesa kwéesa iviꞋá kwétesa suwánanaaomba kemá kwaási úrandako anón-asirayankwara ságayankwaraꞋa ainámpímbá kúmónaꞋa suwánanaaowe. 31uwíremba kwéseꞋa kwíyómpaken-kwayoꞋnarawaꞋa tiꞋmáráanasa Áánútumo ítámakain-kwaasi amápaꞋ-maravakemba tíꞋmaesa moórávimba torupanááowe.

32Ísu mináímbá simásuwena séna moórá-tai naí-táígó áwíꞋa víki-taigontaveꞋa imáyáa umái ísáaro. aráságáyómó agayáínda awánéꞋa séꞋa áúꞋo sínín-kanaa sáwíyankaꞋa tíníye sénááowe. 33mirámó intembá kemá súnda-yantaaꞋa ínaꞋa awánéꞋa séꞋa sáwíyankaꞋa kumíníye sénááowe. 34áraiꞋa simátimeꞋa séꞋa ívéꞋo máyáan-kwaasi évakaꞋa íma pukáiyankaꞋa kemó súnda-yantaaꞋa paáríniye. 35kwíyómba maramá ánásainana kesáái íma ánásena úwoi kwaíkwaiꞋa íníye Ísu siráiye.

kúmónda-kanaa kwaási íma ísaraan-kwasai.

Mááka 13:32-37, Árúku 17:26-30, 34-36

36Ísu mináímbá simásuwena séna kúmónda-kanaama aaváúvímbá kwaási íma isááwasa kwíyómpaken-kwayoꞋnarawaꞋa íma isááwaꞋa kemá Áánútu ááninkoma íma isáúnana kesivo kweyáá ísaraiye. 37naaóváꞋá moóráwai áwíꞋa Nówaa máyonkaꞋa kwaási íma Áánútuntavesa imáyáa ésa maémáéntemba naaémba kemá kwaási úrandako kúmónda mirá ónááowe. 38kavirayán-dónkómó ímo tínkankonkaꞋa nombá toómbá kwénesa tiyáámúmbaaꞋa kwétokwaa-esa aaraí máyówasa kwaaí máyówasa kwéuwana Nówaa non-avóvomayaaꞋo kún-daumpaꞋa umáyowasa 39kavirayán-dónkó tínín-aimba ísaresa íma imáyáa ésa máyówana anón-aꞋa téna kavirayán-dónkó amápa-kwaasi tínkamuwasa putásaraawe. mirámó uráantemba kemá kwaási úrandako kumpaáruraundawai ókwaraꞋa kúmóndaraꞋa kentávésamo ímo imáyáamo íyawai mirá ónááowe. 40minkánáá maará ónááowe. kae-kwáásí kígauvaꞋa méyana Áánútu moóráwaimba auwéna moóráwaimba airáníye. 41minkánáá kaer-ínínkáí toómbá kwégwanteyana Áánútu moórá-inimba auwéna moórá-inimba airáníye. 42kemá kentí Ísóigo kúmónda-kanaama íma ísaraavo kárákwimai máéro. 43simátíménda-aimba imáyáa oró. naakó avowámó umóyán-kwáásímó tínín-kanaamo ísarenarai umóyán-kwáásí timbá kwétoꞋmayaa-ena awánéna kwatúwáísana kwená naaúmpakemba umóyámbá íma máyáísino. 44miráumai kemá kwaási úrandako kumónaundayaveꞋa póꞋa keinárawaꞋa íma imáyáa kwéiyankaꞋa kumúnavainivo kwétoꞋmayaa-eꞋa simuꞋmaréꞋa máéro Ísu siráiye.

sáwíꞋa owasá kaweꞋá owasá uráan-kwasai.

Árúku 12:42-46

45Ísu mináímbá simásuwena séna kaweꞋ-máyáímó kwémayaawai kawer-ímáyáágwárá-kwáásíyávéꞋa kwésune. kwená anóndako séna kesí mayáí-kwáásíráꞋá kárákwire toómbá taaímbai tímaꞋmae iyuwó síníye. 46kwená anóndako téna kwená mayáímó kaweꞋó umáímo mayáínda taawánáínana mayáímó kwémayaindawai arunkó kaweꞋá ínana 47minánóndákó séna kesí náaindaamba amápa-tantaakaꞋa kárákwiyuwo síníye. 48ánivo mimbáyáí-kwáásígómó imáyáamo énamo kesí anóndako ayáátáákaꞋa íma tíníye sénamo 49mayáí-kwáásí tínkamenamo toómbó nénamo uwoaóꞋ-nómbá kwénaan-kwaasiye uwoaóꞋó énamo 50kwená anóndako tínín-kanaa ímo ísarenamo ímo imáyáa kwéindaraꞋa téna 51anónkaꞋa tainkámbai aiꞋmátuwena séna kaumbo-káér-ainkwara-kwaasimo mésamo tíꞋo kwéisasamo iviꞋó kwétesamo túwááyaambo akévundaresamo máyáapaꞋa kóaao síníye Ísu siráiye.